Flet Marsela Sinjari, pedagogia që administron testin teorik të kandidatëve për ushtarë profesionistë. Testimi i kandidatëve për ushtarë profesionistë po bëhet me një metodë krejtësisht të re, ndryshe nga ajo që ishte në vitet e mëparshme. Marsela Sinjari, pedagogia e cila administron testin intelektual të kandidatëve për ushtarë profesionistë tregon në një intervistë për "Shekulli",

risitë e metodës së re.Pedagogia tregon se numri i femrave që aplikojnë për t'u kualifikuar si ushtare profesioniste është i lartë, por jo të gjitha ato mund të sistemohen në ushtri, pasi ka një kuotë të përcaktuar në 12% të numrit total të ushtarëve profesionistë. Marsela Sinjari administron prej tre vitesh testin intelektual që iu nënshtrohen kandidatet femra dhe meshkuj për ushtar profesionistë.

Çfarë metode përdoret për testimin teorik të kandidatëve për ushtarë profesionistë?

Çdo aplikant që vjen për t'u rekrutuar si ushtar profesionist është i detyruar t'i nënshtrohet dy fazave të testimit. E para, është testi fizik dhe pjesa tjetër e testit është intelektuale dhe quhet testi i kualifikimit të kandidatëve për në forcat e armatosura. Testi njeh dy variante aplikimi, të gjatë dhe të shkurtuar. Ne aktualisht aplikojmë variantin e shkurtuar, por së shpejti do të aplikohet varianti i gjatë me nëntë pjesë

A kanë dallime kandidatët që vijnë nga zona të tjera të vendit me ato që vijnë nga kryeqyteti?

Dallimet ekzistojnë dhe mund të them që nuk janë lehtësisht të dukshme. Po të hysh të analizosh rezultatet normalisht që ka dallime, sepse edhe shkollat që kanë mbaruar kandidatët kanë dallime midis tyre. Personat që kanë një arsim të lartë apo kanë pasur rezultate të mira në gjimnaz, renditen të parët në klasifikimin përfundimtar. Dhe ne punojmë që personat që marrin pikët maksimale të futen në punë të parët. Aktualisht kemi rekrutuar 200 individë me arsim të lartë.

Kanë interes femrat për të konkurruar për ushtare me pagesë?

Unë do të thoja që interesi i femrave është i kënaqshëm, prurjet janë të mëdha. Problemi me kandidatet femra është se ne ato nuk mund t'i sistemojmë të gjitha në punë për shkak të kuotës së përcaktuar në ligj që ato kanë.

Cilat femra duan të bëhen ushtare me pagesë?

Pjesa më e madhe e femrave që aplikojnë janë me arsim të lartë dhe vijnë me dëshirën e tyre.

Çfarë pozicionesh pune mund të kenë femrat që fitojnë statusin e ushtarit profesionist?

Pozicionet janë të ndryshme, si në shtabe komandash, operatore, në sistemet e shërbimit shëndetësor, ndërlidhje, polici ushtarake, forcat ajrore, logjistike. Pra, femrat në përgjithësi nuk janë pjesë e forcës luftarake, por në atë mbështetëse të ushtrisë. Aktualisht kemi qendra e personel rekrutimi 300 ushtare profesioniste femra. Kjo pasi kontingjenti femër është i përcaktuar të jetë 12% e planit të përgjithshëm të rekrutimit.

Meshkujt apo femrat arrijne rezultatet më të larta në teste?

Kuptohet që në testin fizik ato që shfaqin rezultatet më të mira janë meshkujt për shkak të natyrës së tyre dhe arrijnë normat dhe standardet më të larta, ndërsa në testin intelektual janë femrat që kapin rezultatet më të larta. Kjo është një ndarje lehtësisht e dallueshme po të shikosh rezultatet.

******

Çfarë pyetjesh përmban testi?

Testi është i kompletuar në një mënyrë të tillë që ndahet në dy kontekste, matematikore dhe gjuhësore dhe gjithsej përmban 105 pyetje. Secila prej pyetjeve ka pikë të caktuara dhe në bazë të një formule nxjerrim rezultatin përfundimtar për secilin kandidat.
Pyetjet ndahen në katër grupe, ku në pjesën e parë bën pjesë arsyetimi aritmetik me 30 pyetje, pjesa e dytë është njohja e kuptimit të fjalëve me 35 pyetje, pjesa e tretë është të kuptuarit e paragrafëve me 15 pyetje dhe pjesa e fundit është njohuri gramatikore me 25 pyetje.
Në ndryshim nga testi i parë, Kandidati është i kushtëzuar në dhënien e përgjigjeve për secilën pjesë dhe këtu fillon standardi për sa i takon mënyrës si aplikohet. Ndryshe nga testi i mëparshëm, në metodën e re ka një kohë të caktuar në dispozicion për secilën pjesë të testit. Kjo mënyrë testi ka qëllim për të parë mënyrën e reagimit edhe të kandidatëve, se si përshtaten ato me rregullat specifike që normalisht kërkohen në Forcat e Armatosura. Thelbi i metodës është për të nxjerrë në pah se sa i aftë është kandidati për të reaguar shpejt.(Marre nga gazeta Shekulli)

Comments

Add New Search

Write comment
Name:
Email:	do not notifynotify
Title:
UBBCode:	-color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge
	Please input the anti-spam code that you can read in the image.

Powered by !JoomlaComment 3.26

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

Tags: Marsela Sinjari, Femrat Ushtare,

Click to add your tags...,

or Close